Guggenmusik Spectaculus Flaachtal

Gugge Spectaculus
Eusen Verein, d'Guggemusig Spectaculus Flaachtal isch im Jahr 1986 gründet worde. Mir händ also scho dörfä oises 25-jährigä fiirä!

Am Afang isch die Guggä na relativ chli gsi und hät mit irärä Musig vorallem i dä Reschtaurant i dä Region ufgschpilt. Ab und zuä isch mer au mal anän Fasnachts-Umzug ächli usserhalb.

Zue öpä 6 Nasä sind im Lauf vo dä Ziit dänn immer meh Mitglieder däzue cho. Im Moment simmer 36 Aktivmitglieder, zämägwürflet us Lüt im Alter zwüsched ca. 20 - 50 Jahr.

Sogar hüt, nach me als foifezwänzg Jahr, isch immer no es Gründigsmitglied bi eus däbi... und äs isch würklich so... wänn'd ämal bi dä Spekis däbi gsi bisch, chasch fascht nümä sii ohni! Mir sind ächt ä glatti Klickä.

Mir machäd Musik quer dur alli Musikstil under dä Leitig vo dä Jasmin Schurter. Jedäs Jahr im Januar oder Februar organisiered mir oise Maskeball in Flaach und gönd susch bi allnä Bäll und Umzüg idä Umgäbig go spilä und öpe eis bis zweimal pro Saison gömmer natürlich au chli wiiter wäg…

Wär na meh über ois wett wüssä cha gern au mal oisi Homepage go bsueche: www.spectaculus.ch. Über än Itrag im Gäschtebuech froiemer ois immer.

Verein

Guggenmusik Spectaculus Flaachtal
Postadresse:
Roman Frei
8416 Flaach

Tel. 078 690 77 52
Website

Kontakt

Roman Frei
info@spectaculus.ch

Mitgliedschaft

Bi dä Spekis mitmachä isch grundsätzlich für alli möglich wo s'Heu öpä uf dä gliichä Bühni händ wi mir...und da tüemär nid so kompliziert!

Altersgränzä gits ä keini, weder nach unä noch nach obä. Allerdings machts scho Sinn, wänn Du bereits än Lehr- oder Schuelabschluss häsch und Dini Freiziit au chasch zur Verfüegig stelle.

Mir probed sozägä s'ganz Jahr durä, jewils am Mäntig Abig ab em Achti bis ca. am halbi Zäni. Je nach däm machedmer au na regischterwis, also z.B. nur Trumpete oder nur Rütmus, ä chlini Prob amäna anderä Tag. S'chunt ächli drufa, wie schwierig d'Musigstückli gschribä sind.

A dä Fasnacht, die duräd bi eus ca. vo ändi Januar bis mitti März, wird dänn aber scho vo jedem Mitglied erwartet, dass äs a dä Wucheänd däbi isch.

Mitgliederbeiträge

D'Mitgliedschaft i oisem Verein isch nid viel türer als äs anders Hobby, aber öpis choschte tuäts halt au bi ois.

Dä Mitgliederbiitrag beträit CHF 150.-- pro Jahr, däzue chömed, allerdings nur all 2 Jahr, na d'Chöschte fürs Gwändli (ca. Fr. 450.--). Dänäbed bruchsch au na chli Chölä für eventuelli Übernachtigä, wämmer amal äs Wucheänd uswärts sind.

D'Chöschte fürs Gwändli falled nur na all zwei Jahr a. Mer händ nämli dämit ufghört, jedes Jahr äs neus z'mache und das s'Jahr druf dänn für viel Gält abzänderä.

Je nach däm, wie viel Gäld i'dä Vereinskasse liet, wird au mal die einti oder anderi Übernachtig, sowie allefalls än Ateil a dä Gwändlichöschte us dä Vereinskasse zahlt.

Für Studäntä, wo ächli meh Problem händ, die 1x pro Jahr afallendä Chöscht z'zahlä, isch au ä gstaffleti "Abzahlig" möglich.

D'Chöschte für äs Inschtrumänt mues jedes Mitglied sälber trägä. D'Musigleiteri entscheided, weläs Regischter na Verstärchig brucht, und hilft Dir bi dä Beschaffig vom entsprächendä Inschtrumänt.